POSLIN OBIDA 

U prošlu nediju, nakon ča je nona učinila feštu o njoki, nono je uzavrija o sriće  ka mlado vino pa naglo oćutija potribu za ubit oko poslin obida. Odma je zaspa i spava ka zaklan.

Ka i uvik oko te ure, ispod ponistre su se karale šjora Mandina i šjora Antula. A ča su sve jedna drugoj izgovorile…to ni pas s maslon ne bi izija! Svakakve su riči pale, Bože te sačuvaj! Bilo je tu raža, škarpina, zmija jutica…pa sve do vuka koji je izija tovara.

I sve bi mi to, ka i uvik, bilo puno smišno  da se baš malo prin tega teatra nisan nabubala njoki toliko da mi se parilo da me nikor dobro ispribiva – bolila me svaka žunta! Bilo mi je za krepat od prižderanosti. Nisan znala ča ću o sebe. Taman kad san i ja tila iskjučit možđane i bokun zadronjat, čujen nonu kako besidi na telefon. S kin to sad ćakula u ovu uru? Sva san se napela da čujen. Ma ona baš sad za pegulu  muči. Muči i sluša. I tako je prošlo barenko po ure da ni rekla ni jednu jedinu rič osin: “Eee.“

Tako van ona u takvin razgovorima sve dozna. Prvo počne sa:“ Eeee!“… to kad čuje ko je zove. Kad dozna čagod važnoga nastavi: “E?“ a kad su kakve novitade, noni se zacakle oči i samo šapje: “Eeee? E? E?“  Ča besida postaje ozbiljnija, oglasi se sa dubokin: “Eeeeee?“ pa još, kad vazme bokun zraka, zamišljeno: “E!“ Doda ona tu dikod i poneki „Ma ča mi kažeš?!“, ali se sve uvik vrati na: “E.“

Nona je u niko doba finalmente svršila s ćakulon pa san i ja onda uspila zadronjat.

NINA MAGLOV, 4.b 

Mentorica: Nikica Sikirica